Aktori i njohur amerikan Ben Affleck fitoi çmimin maksimal prej 1 milion dollarësh në emisionin televiziv “Who Wants to Be a Millionaire”, ku mori pjesë së bashku me kampionin e “Jeopardy!”, Jamie Ding. Dyshja triumfoi pas një përgjigjeje të saktë në pyetjen finale, duke shpërthyer në festë sapo u konfirmua fitorja.
Pyetja e fundit lidhej me gjelat e detit të falur nga presidentët e Shteteve të Bashkuara. Pas disa çastesh diskutimi, Affleck dhe Ding zgjodhën alternativën e duhur, duke siguruar çmimin prej 1 milion dollarësh. Në momentin e konfirmimit të përgjigjes, të dy u ngritën në këmbë dhe u përqafuan të emocionuar.
Shuma e fituar nuk do të shkojë për aktorin, por do t’i dhurohet organizatës jofitimprurëse Eastern Congo Initiative, të cilën Affleck e bashkëthemeloi në vitin 2010 për të mbështetur komunitetet në Republikën Demokratike të Kongos.
Gjatë emisionit, Affleck foli për punën shumëvjeçare me organizatën dhe theksoi se fondet do të ndihmojnë në përballimin e krizës shëndetësore në rajon, përfshirë përpjekjet për të frenuar përhapjen e virusit Ebola.
Fitorja e Affleck u transmetua pak ditë pasi u bë publik lajmi për ndarjen nga jeta të nënës së tij, Chris Affleck, e cila humbi betejën me kancerin në pankreas. Sipas familjes, dëshira e saj e fundit ishte të merrte pjesë në ceremoninë e diplomimit të nipit të saj, gjë që arriti ta realizonte vetëm dy ditë para se të ndërronte jetë.
/vizionplus.tv
