Aktivisti shqiptar u ndalua nga autoritetet izraelite, ministri Hoxha: Goxhaj rrugës për në atdhe
Në një reagim në rrjetet sociale, Hoxha theksoi se strukturat e Shërbimit të Jashtëm shqiptar kanë ndjekur çështjen që nga momenti i parë i sinjalizimit, në koordinim me institucionet shqiptare dhe në kontakt të vazhdueshëm me autoritetet izraelite.
Sipas ministrit, Shqipëria ka kërkuar respektimin e plotë të të drejtave të shtetasit shqiptar, në përputhje me të drejtën ndërkombëtare dhe normat humanitare, duke kundërshtuar çdo formë trajtimi të papranueshëm.
Hoxha e cilësoi rastin si një dëshmi të angazhimit të diplomacisë shqiptare për mbrojtjen e qytetarëve shqiptarë jashtë vendit.
Ministri për Evropën dhe Punët e Jashtme, Ferit Hoxha, postim në X:
Shtetasi shqiptar, z. Baki Goxhaj, pjesëmarrës në flotiljen “Global Sumud”, është tashmë rrugës për në atdhe.
Që në momentin e parë të sinjalizimit, strukturat e Shërbimit të Jashtëm, në bashkërendim me institucionet e tjera shqiptare kanë ndjekur pa ndërprerje çështjen, në komunikim të vazhdueshëm me autoritetet izraelite.
Shqipëria ka qenë e qartë dhe konsistente në kërkesën e saj për respektimin e plotë të të drejtave të shtetasit shqiptar, në përputhje me të drejtën ndërkombëtare dhe normat humanitare, duke reaguar kundër çdo forme trajtimi të papranueshëm.
Ky rast është një tjetër dëshmi e përkushtimit të përditshëm dhe e punës profesionale të Shërbimit të Jashtëm, përfshirë përfaqësive tona #diplomatike dhe konsullore, për t’u gjendur pranë qytetarëve shqiptarë në çdo kohë dhe në çdo rrethanë, me përgjegjësi, profesionalizëm dhe përkushtim të plotë institucional.
Ky është misioni ynë: të përfaqësojmë e mbrojmë interesat e Republikës së Shqipërisë dhe ato kombëtare, të jemi pranë qytetarëve shqiptarë, veçanërisht në momentet kur ata kanë më shumë nevojë për mbështetjen, kujdesin dhe angazhimin e shtetit të tyre.
