Ish-kryeministri Sali Berisha ka vijuar bashkëbisedimet me qytetarët, ku këtë të shtunë është zhvendosur në Gjirokastër për të diskutuar për aksionin opozitar.
Në fjalën e tij, Berisha tha se protesta e së hënës nuk ka lidhje me mbledhjen e Këshillit të Mandateve që do të shqyrtojë kërkesën e SPAK për të ashpërsuar masën e sigurisë ndaj tij.
Në mbledhjen e kryesisë së degës të këtij qyteti, Berisha tha se protesta zhvillohet kundër grushtit të shtetit që sipas tij, qeveria po i bën Kushtetutës dhe se nuk ka lidhje me problemet që ai ka me drejtësinë.
“Nuk protestojm për personin, por protestojmë strict për grushtin e shtetit brenda shtetit që po bën Edi Rama duke marrë pushtetin e parlamentit. Këto protesta do të jenë të pandërprera tani. Nuk ka asnjë zgjidhje tjetër. Ose nënshtrim dhe firmosje që tani të fitores edhe në vitin 2040 të Edi Ramës”, u shpreh ai
Berisha tha se krahas tubimeve në rrugë, protesta do të vijojë edhe në Parlament nga deputetët.
“Lëvizja në parlament ka qëllimet e veta. Ajo do vazhdojë, nuk e ka përmbushur akoma misionin, por kjo lëvizje duhet të jetë një lëvizje qytetare”, tha Berisha.
Duke folur për kërcënimet e Greqisë për të penguar integrimin e Shqipërisë në BE, Berisha tha se do të kishte bërë të njëjtën gjë nëse do të ishte në vendin e kryeministrit grek Kyriakos Mitsotakis.
Berisha tha se për sa kohë Rama është kryeministër, Shqipëria nuk do të integrohet në BE dhe nuk do të ketë zgjedhjeve të lira./vizionplus.tv
