Arrest me burg ka vendosur Gjykata e Korçës për drejtuesin e një mjeti që shaktoi aksident tragjik me pasojë 3 persona të vdekur. Olsi Belortaja, 47 vjeç, është lënë me vendim gjykate në masën e sigurisë arrest në burg.
Ai po hetohet dhe ndiqet penalisht për ngjarjen e pak ditëve më parë lidhur me aksidentin e rëndë automobilistik të ndodhur pranë fshatit Kapshticë. Policia njoftoi për këtë aksident se mjeti i drejtuar nga 47 vjeçari Belortaja aksidentoi fillimisht për vdekje dy gra të moshave 32 dhe 34 vjeç, si dhe një fëmijë të mitur.
Një prej këtyre këmbësoreve humbi jetën në momentet e aksidentit, tjetra gjatë trasportimit në spitalin rajonal të Korçës dhe fëmija pas gati dy ditësh i shtruar në spitalin e traumës në Tiranë. Vetë drejtuesi i mjetit, 47 vjeçari Olsi Belortaja me detyrë agjent doganor në Kapshticë, që sipas policisë rezultoi në gjendje të dehur, u largua nga vendi i ngjarjes dhe ka të dhëna se u arrestua në flagrancë pranë fshatit Cangonj.
Pasojat e një aksidenti tragjik me humbje të trefishtë të jetëve njerëzore dhe largimi nga vendi i aksidentit nuk i ka krijuar asnjë rethanë lehtësuese 47 vjeçarit Belortaja në seancën për vlerësim mase sigurie. Ai do të qëndrojë në burg pa afat deri në zhvllimin e proçesit të rregullt gjyqësor për këtë çështje.
