Gjashtë pasagjerë u vranë në një aksident me autobus, në një autostradë kombëtare në Brazilin juglindor, tha departamenti i zjarrfikësve të Sao Paulos, ndërsa 46 të tjerë u plagosën dhe u dërguan në spitalet e zonës.
Aksidenti, në autostradën BR-153, ndodhi duke zbardhur dita e sotme, pranë qytetit të Marilia, thanë zjarrfikësit në një postim në X. Gjendja e pasagjerëve të plagosur nuk dihet ende.
Gazeta braziliane ‘Folha de S.Paulo’ raportoi se automjeti doli nga kursi dhe u përmbys pasi goma e majtë e pasme i shpërtheu, duke bërë që shoferi të humbiste kontrollin.
Duke cituar deklarata nga policia federale e autostradave të Brazilit, mediat lokale raportuan se autobusi po transportonte punëtorë bujqësorë nga shteti verilindor i Maranhão, në shtetin jugor të Santa Catarina, për të marrë pjesë në mbledhjen e mollëve.
