Një aksident është regjistruar mëngjesin e kësaj të enjteje në afërsi të qytezës së Ulzës. Një automjet tip betoniere ka dalë nga rruga duke përfunduar disa metra poshtë saj.
Ngjarja ka ndodhur në rrugën hyrëse të Ulzës pak mbi nënstacionin e hidrocentralit. Nuk dihen shkaqet e këtij aksidenti ndërsa mësohet se drejtuesi i betonieres është dërguar për mjekim në spitalin e traumës në Tiranë ku ndodhet jashtë rrezikut për jetën.
Aksidenti për pak mund të ishte fatal për drejtuesin e automjetit tip betoniere, për shkak të terrenit në të cilin ka ndodhur. Për fat të mirë, automjeti është ndaluar në përrua dhe nuk ka vijuar më poshtë.
Mësohet se drejtuesi i mjetit po punonte për firmën që po zbaton një projekt për rivitalizimin e vijës liqenore në Ulëz.
Për ngjarjen në fjalë nuk ka asnjë raportim për mediat nga Policia e Dibrës, ndërsa banorët thanë se kanë qenë ata që i kanë dhënë ndihmën e parë drejtuesit të automjetit.
