Në Tiranë është prezantuar sot “Albanian Digital Solution Sh.A.”, një nismë e re që synon modernizimin e shërbimeve publike dhe forcimin e inovacionit teknologjik në vend. Në aktivitet ishte i pranishëm Kryeministri Edi Rama.
Rama e cilësoi ditën si të shënuar në rrugën e revolucionit digjital dhe transformimit të qeverisjes përmes teknologjisë, duke theksuar se krijimi i shoqërisë së re vjen si domosdoshmëri në këtë fazë të zhvillimit të shërbimeve elektronike.
Ai vlerësoi rolin e AKSHI-t, duke e cilësuar si një histori të jashtëzakonshme suksesi që, sipas tij, ka kaluar një rrugë jo të lehtë.
Sipas tij, “Albanian Digital Solution” vjen si pjesë e nevojës për të forcuar më tej infrastrukturën dhe kapacitetet në fushën e qeverisjes elektronike.
Rama: Është një ditë e shënuar në rrugën e revolucionit digjital dhe transformimit të qeverisjes së vendit përmes teknologjisë, sepse sot ne bëjmë publike një kompani të re, një shoqëri të re, e cila krijohet si një domosdoshmëri në këtë fazë të re të zhvillimit të qeverisjes elektronike. AKSHI është një histori e jashtëzakonshme suskesi, e cila ka kaluar përmes një rruge aspak të lehtë, një rrugë që ka nisur me një grusht shërbimesh dhe që pastaj ka kulmuar në 1200 shërbime publike online, një rrugë që ka nisur me një grusht njerëzish që përdornin platformën dhe pastaj ka kulmuar me 3 milionë përdorues. Një rrugë ku nevoja për financim ka ardhur duke u rritur, pasi sistemet e ndërtuara kërkojnë financim qoftë për t’u ndërtuar, qoftë për t’u mirëmbajtur.
Rama sqaroi se “Albanian Digital Solution” synon të zhvillojë sisteme teknologjike pa qenë gjithmonë e nevojshme ndërhyrja e sektorit privat, por duke ndërtuar një kompani publike të fortë dhe konkurruese në këtë fushë.
Shefi i qeverisë u shpreh se ambicia është krijimi i një kompanie publike që të jetë ndër më të suksesshmet në treg, me kapacitet për tërheqjen e talenteve brenda dhe jashtë vendit, duke ofruar paga konkurruese dhe mundësi fleksibile pune, përfshirë edhe punën në distancë.
Rama: Albanian Digital Solution, do të zhvillojë sisteme pa pasur gjithmonë nevojë që shteti t’i drejtohet privatit, por përkundrazi me ambicien që shteti të krijojë kompaninë më të suksesshme publike të zhvillimit të sistemeve dhe të mirëmbajtjes së tyre. Kompaninë më të suksseshme në treg, një kompani e cila të ketë kapacitetin të kthehet në një hapësirë për të gjithë talentet, një kompani e cila të ketë pagat më të larta, të ketë kapacitetet që talenteve brenda dhe jashtë vendit t’u ofrojë mundësinë të bëhen pjesë e saj, duke kombinuar punën qoftë në zyrë qoftë në distancë, një kompani e cila të jetë garanci për institucionet e vendit, një kompani që të garantojë vazhdimësinë teknike. Kjo është ambicia.
