Kandidati për kryetar në Partinë Demokratike, Agron Shehaj doli në një konferencë për mediat këtë të hënë, për t’i kërkuar kreut aktual, Lulzim Basha, të hapë rrugën.
Ai zbuloi se vendosi të bëhet pjesë e garës për lidershipin e PD-së sepse ka bindjen se me Bashën në krye, kjo parti nuk shkon dot drejt fitores.
“Nuk kam asnjë arsye personale që më ka shtyrë të kandidoj për kryetar. Jam bindur që Lulzim Basha nuk e çon dot PD-në në fitore, është bindje personale. E kuptoj që shumë prej jush mund të kenë arsye të ndryshme nga kjo, por është shumë e thjeshtë. Jam i bindur që nëse ne duam që PD të fitojë zgjedhjet, duhet me “sesbën” të ndryshojmë lidershipin e PD-së. Partia Demokratike duhet të jetë e hapur, nuk duhet të më pëlqejnë mua apo ta kenë mirë me mua.”
Propozimi i Agron Shehajt është që të sanksionohet në Statutin e partisë që nëse një kryetar humbet zgjedhjet, të largohet.
“Duhet të jepet dorëheqja kur humben zgjedhjet, pa asnjë kundërshtim.”
