Seanca e mbrojtjes për 10 të pandehurit e inceneratorit të Elbasanit dështoi. Shkak për këtë u bë mungesa e dy prej përfaqësuesve ligjorë të dy prej të pandehurve, Bardhyl Çabiri dhe Serafin Papa.
I pranishëm në seancë ishte ish-deputeti socialist, Alqi Bllako, ndërsa ish-Minstri i Mjedisit, Lefter Koka, mungoi.
Jashtë seancës, Tritan Hamitaj, avokati i ish-ministrit Koka, u shpreh se organi i akuzës nuk ka përcaktuar datën e kryerjes së veprës korruptive, për të cilën akuzohet klienti i tij.
TRITAN HAMITAJ
AVOKAT
Është e paqartë në lidhje me datën e kryerjes së veprës penale të korrupsionit. Nuk është përcaktuar në asnjë vend, as në njoftimin e marrjes së akuzës, as në kërkesën për gjykim.
Në të njëjtën kohë, sipas avokatit, prokuroria e posaçme i ka kërkuar gjykatës ngrirjen e një sërë asetesh në pronësi të Lefter Kokës, të cilat tejkalojnë vlerën e veprës penale të korrupsionit, e cila parashikohet të jetë rreth 2.9 milionë euro.
TRITAN HAMITAJ
AVOKATNuk përputhet vlera e produktit të krimit, që është afërsisht 309 milionë lekë me pasuritë që kërkojnë të konfiskohen. Është shumë e madhe, pasi nuk e dime vlerën e 8 apartamenteve, ndërkohë që kantina ka një vlerë prej 244 milionë lekë, një kontratë që janë shitur 3 njësi janë 610 mijë euro, një vilë është 350 milionë euro, që janë shumë më shumë se 390 milionë lekë. Duhet të kenë një rrjedhë logjike konkluzionet e prokurorisë që vlera e krimeve të kishte koherencë me vlerën e konfiskimit.
Për inceneratorin e Elbasanit, Spak i ka kërkuar gjykatës dënimin me 10 vjet heqje lirie për ish-ministrin Koka, njëlloj edhe për 2 pronarët e impiantit, Klodian Zoto dhe Mirel Mërtiri. Për Stela Gugalljan, prokuroria kërkoi 7 vjet burg. Ndërsa, për Alqi Bllakon u kërkua 4 vjet. Por të gjithë ata përfitojnë ulje të dënimit, për shkak të gjykimit të shkurtuar.
