Dy pika karburanti në Tiranë dhe Vlorë, janë ndëshkuar me gjobë, pasi abuzuan, duke vendosur çmim më të lartë nga sa ishte përcaktuar nga Bordi i Administrimit.
Kryeministri Edi Rama bën me dije se ata janë ndërshkuar me masën më të ashpër administrative, ndërsa shtoi se duke nisur nga java tjetër, do të hyjë në fuqi vendimi për sekuestrimin e çdo pike karburanti për rritjen e çmimit.
“Sot janë kapur dy pika karburanti në Tiranë dhe Vlorë me faturime mbi çmimin e caktuar për të gjithë. Subjektet janë gjobitur me maksimumin ligjor. Duke nisur nga java tjetër do të hyjë në fuqi sekuestrimi në vend i çdo pike karburanti që ngre qoftë edhe një qindarkë çmimin e shpallur paraprakisht nga Bordi i Administrimit. Boll i ngre çmimet papushim kriza e shkaktuar nga lufta në Ukrainë, çdo ngritje për fitim në kurriz të popullit do të ndëshkohet siç e kërkon kjo gjendje lufte në tregjet ndërkombëtare”, shkruan Rama.
