Abuzimi me 80 hektarë tokë në bregdet

Prokuroria e Kavajës përfundoi hetimet dhe dërgoi për gjykim ish-drejtuesin e Hipotekës së këtij qyteti, Fatos Gjuzi, ish-kryetarin e Komunës Gosë, si edhe disa ish-zyrtarë të tjerë, të akuzuar për veprat penale të “Falsifikimit të dokumenteve” dhe “Shpërdorimit të detyrës”. Sipas organit të akuzës, këta persona në kundërshtim me ligjin, kanë tjetërsuar, regjistruar dhe shpërndarë rreth 80 hektarë tokë bregdetare në zonën e Vilë-Bashtovës. Këtë sipërfaqe, e cila tashmë është nën sekuestro preventive, ish-zyrtarët ua kanë kaluar në pronësi disa familjeve bujqësore, të cilat nuk kanë asnjë dijeni se janë pronarë të hapësirave në bregdet. Më pas, këto toka, ish-zyrtarët ua kanë shitur personave të tretë.
Sipas Prokurorisë, ish-kryetari i komunës Gosë, Sinan Shala dhe ish-zyrtarët lokalë të ndarjes së tokave, Nezir Leçini, Myzafer Xhelilaj e Idriz Thaçi, falsifikuan të gjithë dokumentacionin, në bazë të të cilave rreth 80 hektarë tokë bregdetare, e cila nuk lejohej ligjërisht të ndahej është regjistruar si tokë bujqësore. Falsifikimi është bërë duke ngjitur në regjistrat përkatës disa letra të rreme, në bazë të të cilave Këshilli i Rrethit Kavajë kishte miratuar ndryshimin e destinacionit të tokës.
Pasi kanë ndryshuar destinancionin e tokës nga bregdetare, në tokë arë, e kanë shpërndarë atë në disa familje bujqësore të zonës. Nga veprimet e Prokurorisë së Kavajës, këto familje edhe pse ishin pajisur më parë me tokë rezultonte se në emër të tyre ishin regjistruar disa herë më shumë metra sa i takon. Pas verifikimeve doli se veprimet në emër të tyre ishin kryer nga ish-zyrtarët e komunës dhe të komisionit të ndarjes së tokave, të cilët tashmë janë marrë të pandehur.
Gjithashtu, pasi janë regjistruar këto prona në emër të disa familjeve bujqësore, të pandehurit kanë realizuar fiktivisht rolin e përfaqësuesit të tyre për shitjen e këtyre pronave tek persona të tretë. Të gjitha veprimet e paligjshme të realizuara nga ana e ish-zyrtarëve të komunës Gosë janë legjitimuar nga ish-drejtuesi i Hipotekës Kavajë, Fatos Gjuzi.