Çështja e presidentit në Kosovë vijon të mbetet pa zgjidhje, ndërsa opozita vjen me një propozim i ri për të dalë nga ngërçi institucional. Aleanca për Ardhmërinë e Kosovës propozon që zgjidhja të vijë përmes një gare për kreun e shtetit, ku kandidati i opozitës do të ishte Ramush Haradinaj.
“Ramush Haradinaj asnjëherë s’ka lypë votë. Ka thënë se, nëse opozita e mbështet kandidaturën e tij, atëherë do të ketë garë zgjedhore. Ky pozicion do ta zhbllokonte Kosovën. Nuk dihet kush do të fitonte, por do të kishte një kandidat të opozitës dhe një kandidat të Vetëvendosjes”, tha Besnik Tahiri, deputet i AAK-së
Tahiri kritikoi gjithashtu synimin që, sipas tij, një forcë e vetme politike të kontrollojë njëkohësisht Presidencën, Qeverinë dhe Kuvendin.
“Nuk mund të vazhdojmë me një situatë ku një parti i merr të tria pozicionet kryesore të shtetit, sepse kjo do ta kthente shtetin parlamentar në një shtet autoritar”, shtoi Tahiri
Deputeti i AAK-së nuk përjashtoi mundësinë që bllokada institucionale të vazhdojë, çka mund ta çojë Kosovën sërish drejt zgjedhjeve të reja, nëse palët politike nuk arrijnë konsensus për zgjedhjen e presidentit.
