Opozita akuzon ministrin e Brendshëm Saimir Tahiri, si njeriun e lidhur me trafikun e drogës dhe ngre pyetje nëse ai është i lidhur me mafien italiane. Enkeleja Alibeaj ripersërit se ministri vjel 30% të çmimit për çdo rrënjë kanabis të mbjellë.
“A ka qenë ministri yt i drogës, në linjën Durrës-Bari ne datat 29-31 Korrik, në shoqërinë e drejtuesve të rrugëve kryesore të kanabisit, Arjanit Arapi, Jaeld Çela, Boge Bodini? Cili ka qenë synimi i këtij udhëtimi? A ka qenë në kthim Tahiri në shoqërinë e disa shtetasve italianë në tragetin ku kishin rezervuar 3 kabinat e sipërme?A janë regjistruar këta shtetas kur kanë hyrë në pikën kufitare të Durrësit bashkë me Tahirin në orën 22.20 të 31 Korrikut? Nëse jo, pse nuk janë regjistruar? A keni të dhëna nga burime të brendshme apo të huaja se shtetasit italianë dyshohen të jenë përfaqësues të organizatës famëkeqe të Mafias Italiane, Sacra Corona Unita? Po dalja dhe kthimi i Tahirit dhe shpurës se tij, a janë regjistruar në pikën kufitare? Nëse jo, pse jo?”
Për opozitën, lëvizjet e ministrit nuk janë të rastësishme.
“Këto lëvizje që përkojnë me pikun e sezonit të hashashit dhe trafikimit të sasive të mëdha në Itali janë dëshmi tronditëse të implikimit të thellë të qehajait të Ramës në menaxhimin e transportimin e drogës”
Opozita prej ditësh ka nisur një valë akuzash në adresë të kryeministrit, ministrit të Brendshëm dhe zyrtarë të lartë të Policisë së shtetit si mbrojtës dhe përfitues nga narkotrafiku.
