“Loja” politike sa vjen e po nxehet në Shqipëri, ndërkohë që partitë e mëdha e të vogla, të vjetra e të reja po pozicionohen në llogoret e tyre duke lidhur aleancat parazgjedhore.
PD e Sali Berishës ka mbledhur rreth vetes aleatët tradicional PR, PDK, PBDNJ, PL dhe disa nga partitë e vogla, ndërkohë që PS duket se sërish në këto zgjedhje do të garojë e vetme.
Ndërkohë gjatë ditës së sotme Nisma Thurje e Endri Shabanit bëri koalicion me “Shqipëria Bëhet” e Adriatik Lapajt, ndërsa Djathtas 1912 e Enkelejd Alibeajt ka bërë koalicion me LZHK-në e Dashamir Shehit, ndërsa janë në pritje që tu bashkohen edhe euroatlantikët e Lulzim Bashës.
Po sa e ndihmojnë këto ndarje opozitën në zgjedhje përballë një PS-së e cila konsiderohet si makineri votash?
Në një lidhje me Edicionin Qendror të Lajmeve të orës 19:00 në Televizionin Kombëtar Vizion Plus, të moderauar nga Pranvera Borakaj, Edvin Kulluri i “Djathtas 1912-të” tha se kush do të bëhet pjesë e koalicionit të tyre duhet të ketë të qartë tre shtyllat kryesore, zgjatjen e mandatit të SPAK, orientimin properëndimor dhe ndryshimin e kodit zgjedhor.
Pjesë nga intervista:
Borakaj: Partia “Djathtas 1912” dhe LZHK e drejtuar nga Dashamir Shehi kanë shpallur tashmë se do të garojnë me një koalicion të përbashkët në zgjedhje. Por ju keni ftuar edhe partitë e tjera të opozitës tu bashkohen, duke propozuar organizimin e një tryeze të përbashkët. A keni marrë deri tani një përgjigje nga këto forca politike?
Kulluri: Ka kohë deri në datë 3 për të marrë një përgjigje. Ne i kemi hyrë kësaj iniciative me qëllimin që përballë PS dhe PD që kanë goditur sistemin demokratik mund të kenë vetëm një ilaç që është bashkimi i të gjitha partive të reja, për shkak të këtij sistemi elektoral. Fatkeqësisht jo të gjithë janë përgjigjur pozitivisht. Kushdo është i lirë të bëjë zgjedhjene tij, ka njerëz që se kuptojnë që kjo është përgjegjësi e madhe, jo çështje aventurash.
Borakaj: A po negocioni me Lulzim Bashën për të garuar së bashku në 11 maj?
Kulluri: Mesazhi ka qenë për të gjitha partitë përtej PS dhe PD.
Borakaj: A keni kushte ndaj partive të cilat duan të lidhin aleancë me ju?
Kulluri: Ne kemi shpallur tre prioritete, mbështetja ndaj drejtësisë, orientimi properëndimor dhe demokratizimi i vendit për një kod zgjedhor me lista të hapura. Në pamje të parë të gjithë janë dakord, i vetmi ndryshim është që Vetëm LZHK dhe Djathtas 1912 kanë ndërmarrë veprime konkrete, duke deklaruar zgjatjen e mandatit të SPAK. Ndarja dhe personalizimi i votës do të dëmtojë partitë e vogla. Nuk kam gjetur asnjë arsye të vërtetë për të mos pranuar këtë ftesë bashkëpunimi. Jemi në pritje ende të përgjigjes, përndryshe ne do të vazhdojmë rrugën tonë.
Borakaj: PD dhe aleatët e saj do të garojnë me një koalicion, “Shqipëria Bëhet” dhe Nisma Thurrje shpallën koalicionin e tyre, ju keni një koalicion; tre formacione opozitare që garojnë më vete a e përçajnë votën e opozitës dhe favorizojnë PS?
Kulluri: Kjo pyetje i duhet bërë atyre që nuk i përgjigjen pozitivisht ftesës. Ne e kemi bërë ftesën për të gjithë. Kemi dhënë tolerancën dhe kontributin maksimal për një koalicion të ndershëm.
