A ka interes Kina për Shqipërinë? Softa: Ata të krijojnë varësi përmes kredisë, do të rrezikonin sigurinë kombëtare
Eksperti i ekonomisë, Fatjon Softa, i ftuar në “Quo Vadis”, të moderatores Pranvera Borakaj në Vizion Plus, ka komentuar “shkeljen e syrit” të kryeministrit Edi Rama ndaj Kinës në një takim me biznesin amerikan.
Softa tha se, pavarësisht çfarë ndodhi, Shqipëria ka një histori me këtë çështje, ku refuzoi 5G-në e Kinës pas presionit amerikan.
Sipas tij, kinezët kanë treguar në Ballkan se imponohen përmes kredisë.
Pjesë nga biseda:
Softa: Shqipëria nuk është në një krizë institucionale. Si e tillë, kryeministri i vendit i ka votat, nuk ka probleme me votat, nuk është në një moment siç ishin rastet kur një parti e vogël e rrëzonte. E ka maksimumin e votave dhe qeverinë e qetë. Brenda ka pafund probleme. Kina është përmendur edhe në një moment të mëparshëm, kur u përmend 5G. Pati një presion nga SHBA që të mos pranonte 5G-në e ardhur nga Kina. Ishte një presion i fortë dhe qeveria firmosi një marrëveshje me SHBA-në që nuk do të pranonte teknologjinë kineze.
Borakaj: Ka interes Kina për Shqipërinë?
Softa: Ka interes për Ballkanin. Import-eksporti me Italinë është 40%, ndërsa Kina, Greqia e të tjera janë nga 8 deri në 12%, pra nuk ndikojnë shumë në tregun shqiptar. Nga pikëpamja e sigurisë, Kina përbën një problem, ose të paktën shqetësim për SHBA-në; patjetër që Kina mbetet një shqetësim.
Borakaj: Për çështje influence?
Softa: Çështje influence dhe sigurie globale. Kina jep kredi dhe krijon varësi. Kina ka hyrë në Mal të Zi dhe ajo autostrada e Podgoricës është investim i kinezëve, madje kanë kërkuar të kenë edhe portin e Tivarit. Kur Greqia ishte në krizë, blenë portin e Pireut. Në Venezuelë kanë dhënë miliarda euro dhe kërkojnë t’i kthehen përmes naftës. Duke marrë naftë, SHBA-së i është hequr influenca për naftën. Nëse kamerat që do të vijnë në Shqipëri janë prodhim kinez, kjo do të thotë problem për sigurinë kombëtare. A ka nevojë Shqipëria për një “Smart City”?
