Një shumë prej 2.5 milionë dollarësh i është dorëzuar heroit të Bondit, Ahmed Al-Ahmed, i cili çarmatosi një nga autorët e sulmit terrorist në Bondi Beach në Sydne.
Shuma u mblodh nga rreth 43,000 njerëz në të gjithë botën, përmes një fushate online, si shenjë mirënjohjeje për aktin e tij.
Një video e postuar në mediat sociale tregon momentin kur 42-vjeçari, baba i dy fëmijëve me origjinë siriane, informohet për shumën.
“A e meritoj?” pyet ai, dukshëm i prekur, ndërsa burri që i jep çekun i përgjigjet: ” Çdo qindarkë …”
I pyetur se çfarë mesazhi donte t’u dërgonte dhjetëra mijëra donatorëve, Ahmed Al-Ahmed foli për unitetin dhe solidaritetin.
“Duke qëndruar së bashku, të gjithë njerëzit, duke lënë pas gjithçka që është e keqe dhe duke vazhduar të shpëtojmë jetë. Duke shpëtuar jetë “, tha ai nga shtrati i spitalit, duke shtuar: “Kur shpëtova njerëz, e bëra nga zemra”.
Videoja shkaktoi emocione të forta dhe një lumë komentesh në mediat sociale, me shumë përdorues që lavdëruan modestinë e tij dhe e quajtën atë një “hero”.
Sulmi ndodhi të dielën në mbrëmje, gjatë festës Hanukkah në plazhin Bondi, ku qindra njerëz ishin mbledhur për të festuar ditën e parë të festës hebraike. Nga të shtënat u vranë 15 persona, përfshirë një vajzë 10-vjeçare, dhe u plagosën rëndë dhjetëra të tjerë.
Ahmed Al-Ahmed, pronar i një dyqani ushqimor në Sutherland, arriti të çarmatoste një nga autorët e sulmit terrorist.
Ai i rrëmbeu armën dhe e shtriu përtokë.
Ai u plagos me armë zjarri në shpatull dhe krah.
