Pakistani dëshiron të jetë ndërmjetës midis Uashingtonit dhe Teheranit, duke thënë se është gati të presë bisedime që synojnë arritjen e një marrëveshjeje që do të çojë në uljen e tensioneve.
Zëdhënësi i ministrisë së jashtme të Pakistanit, Tahir Andrabi, i tha Al Jazeera se Islamabadi ka qenë gjithmonë në favor të diplomacisë si një mjet për të siguruar stabilitetin në rajon.
Në të njëjtën kohë, një zyrtar izraelit zbuloi se Uashingtoni dëshiron t’i japë fund konfliktit në Lindjen e Mesme deri më 9 prill.
“Nëse palët dëshirojnë, Islamabadi është gjithmonë i gatshëm të presë bisedime”, tha Andrabi, duke shtuar se Pakistani ka mbështetur vazhdimisht dialogun dhe diplomacinë si një mënyrë për të promovuar paqen dhe stabilitetin rajonal.
Deklarata erdhi një ditë pasi Presidenti i SHBA-së Donald Trump njoftoi një armëpushim 5-ditoer, ndërsa deklaroi se Shtetet e Bashkuara dhe Irani ishin në negociata “shumë të mira” .
Teherani ka mohuar se po merr pjesë në bisedime me SHBA-në, por një sërë raportesh në mediat amerikane dhe izraelite kanë thënë se disa vende, përfshirë Pakistanin, Egjiptin dhe Turqinë, kanë vepruar si ndërmjetës.
9 prilli është data e synuar për t’i dhënë fund luftës
Ndërkohë, qëllimi i Shteteve të Bashkuara për të kërkuar përfundimin e konfliktit deri më 9 prill u njoftua nga një zyrtar izraelit, duke cituar deklaratat e Donald Trump.
Sipas të njëjtit burim, ky afat kohor lë rreth tre javë për vazhdimin e operacioneve ushtarake, por edhe për intensifikimin e kontakteve diplomatike.
Zyrtari tha se bisedimet midis Shteteve të Bashkuara dhe Iranit pritet të zhvillohen më vonë këtë javë në Pakistan.
