Një nga personat më të kërkuar nga drejtësia shqiptare, Durim Bami, është ekstraduar këtë të enjte nga Emiratet e Bashkuara.
Ai është marrë nga aeroporti i Rinasit, ku është shoqëruar për në institucionin e vuajtjes së dënimit nën masa të rrepta sigurie.
Lexo edhe :
Autoritetet në Dubai i kanë dhënë fund shpresës për liri një prej personazheve më të fuqishëm të botës së krimit që dominonte bandat kriminale në Nikël dhe Fushë-Krujë. Nën masa të forta sigurie, ai u shoqërua nga forcat policore në Rinas dhe më pas u përcoll për në qeli ku pritet gjithashtu që t’i komunikohen akuzat e ngritura më herët nga Prokuroria e Posaçme.
Durim Bami ishte arrestuar më herët nga autoritetet në Dubai, ku “Interpol Tirana” kishte nisur procedurat dhe kishte përcjellë dosjen e SPAK në lidhje me krimet për të cilat akuzohet ai në mënyrë që gjykata në Emiratet e Bashkuara të jepnin dritën jeshile për ekstradimin e tij në vendin tonë. Ishte Prokuroria e Posaçme që shpalli në kërkim Durim Bamin në kuadër të dosjes “Revanshi” i akuzuar për kultivim të parcelave të drogës në zonën e Fushë-Krujës. Ai akuzohet si personi që kishte porositur disa herë vrasjen e ish-deputetit të PS-së në Lezhë, Arben Ndoka.
Lufta mes Bamit dhe Ndokës kishte nisur nen dyshimet se i forti i Niklës kishte dyshime se ish-deputeti kishte kërkuar ta eliminonte pasi Ndoka kishte dyshime se Bami ishte një nga personat që kishte marrë pjesë në vrasjen e vëllait të tij Aleksandër Ndoka. Sipas dosjes voluminoze Durim Bami akuzohet gjithashtu edhe për sigurimin e kushteve për të vrarë dy miqtë e Ervis Martinaj, Erigers Mihasin dhe Tori Xheçukën.
Sa i takon aktivitetit kriminal të Bamit, SPAK argumenton në dosje se ai përveç atentateve dhe vrasjeve ku faktohet si i përfshirë, kishte rol të madh edhe ne kontrollonin e parcelave të drogës të kultivuara nga bregdeti i Adriatikut deri në Malësinë e Krujës, ku madje në disa raste kishte siguruar edhe mbështetjen edhe të policisë.
