“Arrest me burg” ka dhënë Gjykata e Shkallës së Parë Durrës për kapitenin dhe mekanikun e peshkarexhës, në të cilën u sekuestruan 80 mijë litra naftë kontrabandë me qëllim shmangien e detyrimeve doganore në portin e qytetit.

 

Të arrestuarit, Falmur Alia dhe Nuri Xheka, kanë dalë para gjykatës dhe janë njohur me masën e sigurisë.

 

Avokatet e punonjësve të peshkarexhës kanë kërkuar një masë më të lehtë, atë të detyrim paraqitje, por që nuk është pranuar nga trupi gjykues duke i lënë në burg.

 

Vetë të pandehurit kanë hedhur poshtë akuzat e prokurorisë e cila pretendon se anija ka dalë në det pa njoftim, ndërsa sasia e karburantit sipas tyre ishte marë për përdorim vetjak të anijes dhe se do të deklarohej pranë autoriteteve shtetërore.

 

Nga ana tjetër prokuria pretendon se nga veprimet hetimore të kryera, ka rezultuar se të akuzuarit kishin dalë në det, pa njoftuar kapitenerinë dhe Policinë Kufitare, me qëllim marrjen e një sasie prej rreth 80.000 litrash naftë dhe futjen e saj kontrabandë.

 

Gjithashtu në vijim të veprimeve, shërbimet e Policisë gjetën të përshtatur një depozitë në peshkarexhën e këtyre shtetasve, për mbajtjen e naftës së kontrabanduar.

 

Lidhur me operacionin i cili u zhvillua dy javë më parë, policia ka shpallur në kërkim administratorin e peshkarexhës, Alban Malindi, për të cilin po punohet për arrestimin e tij.

Leave a Reply

Your email address will not be published.