60 milion euro dëm nga mashtrimet

60 milionë euro është vlera e përfitimi të paligjshëm dhe dëmi ndaj shtetit nga krimi financiar apo skemat e mashtrimeve dhe falsifikimeve. Shumën e bën të ditur Prokuroria e Përgjithshme, pas bilancit të 6-mujorit të dytë të vitit 2015. Sipas organit të akuzës, skemat mashtruese financiare kane ndodhur kryesisht në tregun e karburanteve, ne atë farmaceutik, ne koncensione, ndërtim, etj. Nje ndër skandalet më të mëdha në shëndetësi u zbulua në muajin tetor, vetëm nga abuzimi me rimbursimin e ilaçeve, u vodhën rreth 2 milionë euro. Në krye të kësaj skeme, dyshohet se është drejtuesi i kompanisë farmaceutike “Omega Pharma”. Në dhjetor 2015, Prokuroria e Fierit zbuloi një abuzim masiv në tregun e karburanteve, me vlerë rreth 2.5 milionë euro. I akuzuari kryesor është administratori i kompanisë “Tea Oil”, Adrian Xhillari. Ai kishte paguar disa zyrtarë të lartë duke shitur në treg naftë vixhin. Po në dhjetor u dërguan për gjykim dy skema financiare të shtrira në disa vite. Njëra prej tyre ishte ajo e kompanisë së drejtuar nga Kastriot Ismailaj, me vlerë rreth 10 milionë euro. Por, deri më tani, asnjë euro nga shuma prej 60 milionë eurosh dëm, nuk i është kthyer shtetit. Sipas Prokurorisë, paratë mund të merren vetëm në rastin e një vendimi të formës së prerë nga ana e Gjykatës. Organi i akuzës raporton gjithashtu se në 6 muaj, u vendosën nën sekuestro pasuri të paluajtshme e të luajtshme me vlerë rreth 45 milionë eurosh. Janë bllokuar llogari bankare, sipërfaqe tokë bujqësore dhe truall, si dhe prona të ndryshe.