Për shumë udhëtarë, vera është koha ideale për aventura në natyrë. Por në veri të Europës ekziston një fenomen i rrallë që e bën këtë stinë edhe më të veçantë: “Dielli i Mesnatës”, kur dielli qëndron mbi horizont edhe gjatë natës, duke krijuar përshtypjen e një dite që nuk mbaron kurrë. Ky fenomen ndodh në rajonet pranë Rrethit Arktik për shkak të pjerrësisë së boshtit të Tokës dhe mund të zgjasë nga disa javë deri në disa muaj.
Sipas një artikulli të National Geographic, këto janë disa nga destinacionet më të bukura europiane ku mund të përjetoni këtë spektakël natyror.
1. Svalbard, Norvegji
I vendosur shumë pranë Polit të Veriut, arkipelagu Svalbard përjeton diell të pandërprerë nga mesi i prillit deri në fund të gushtit. Vizitorët mund të shijojnë ecje në natyrë, lundrime dhe peizazhe arktike të mbuluara nga një dritë e butë rozë dhe e artë.
2. Reykjavik, Islandë
Kryeqyteti islandez shndërrohet në një qytet pothuajse 24-orësh gjatë verës. Nga mesi i majit deri në korrik, errësira pothuajse zhduket, duke u dhënë turistëve mundësinë të eksplorojnë vullkanet, ujëvarat dhe peizazhet e famshme islandeze edhe në orët e vona të natës.
3. Laplanda Suedeze
Në veri të Suedisë, qielli gjatë natës vishet me nuanca rozë dhe portokalli. Zona është ideale për alpinizëm, kajak, peshkim dhe aventura në natyrë, ndërsa mali Kebnekaise ofron pamje spektakolare nën dritën e diellit të mesnatës.
4. Ishujt Lofoten, Norvegji
Të njohur për fjordet dhe malet e tyre mahnitëse, Ishujt Lofoten janë një nga vendet më të bukura për të përjetuar ditët pa fund. Nga fundi i majit deri në mesin e korrikut, dielli ndriçon vazhdimisht peizazhin e arkipelagut.
5. Laplanda Finlandeze
Nga maji deri në gusht, veriu i Finlandës ofron mundësi për ecje, peshkim, sauna tradicionale dhe not në liqene nën dritën e diellit që nuk perëndon. Në qytetin Sodankylä zhvillohet edhe festivali i famshëm “Midnight Sun Film Festival”.
6. Groenlanda Veriore
Qyteti Qaanaaq, një nga vendbanimet më veriore të botës, përjeton diell të vazhdueshëm për muaj të tërë. Vizitorët mund të shohin ajsbergë të ndriçuar nga drita e mesnatës dhe të eksplorojnë natyrën e egër arktike.
