“Koha e mbërritjes së urgjencës është reduktuar me 2 minuta e 57 sekonda, me investimin e qeverisë për përforcimin e flotës së autoambulancave në territor”. Kështu deklaroi ministrja Manastirliu gjatë ceremonisë së dorëzimit të pesë autoambulancave nga ana e qeverisë turke.
Manastirliu u shpreh gjithashtu e bindur se do të përmirësohet akoma më shumë koha e pritjes së urgjencës dhe cilësisë së shërbimit.
“Me qendrën unike të koordinimit të urgjencës mjekësore dhe shtrirjen e numrit 127 në të gjithë territorin, me investimet për 32 autoambulancat e reja nga qeveria shqiptare si dhe pesë të tjera që i shtohen sot flotës së autoambulancave kryesisht në zonat rurale dhe malore, përmirësojmë kohën e pritjes së urgjencës dhe cilësinë e shërbimit. Vetëm për tremujorin e parë të vitit 2019 urgjenca mjekësore i është përgjigjur 96 mijë thirrjeve për ndihmë mjekësore në rang vendi. Numri i misioneve të kryera është rreth 25 mijë, nga të cilat 13 mijë e 400 misione pacientë janë trajtuar në banesë dhe 10 mijë janë transportuar për ndihmë të specializuar në spital. Trajtimi në banesë i më shumë se gjymës së pacientëve, shënon një arritje cilësore të shërbimit mjekësor të ofruar nga ekipet e urgjencës mjekësore,”, tha Manastirliu.
Ndërsa ambasadori i Turqisë në Shqipëri, Ahmet Yoruk vuri theksin te marrëdhëniet e shkëlqyera mes dy vendeve dhe mbështetja e pakursyer për Shqipërinë.
“Jemi gjithmonë në krah të popullit mik shqiptar, me investime në një gamë të gjerë shërbimesh, por me fokus te shëndetësia. Do të vijojmë të jemi afër nevojave tuaja”, tha ambasadori i Turqisë.
