Ka një shifër thuajse konstante çdo vit të shqiptarëve që zgjedhin resortet e Turqisë për pushime.
Të dhënat flasin se janë rreth 40 mijë qytetarët që ikin drejt destinacioneve turke. Agim Mehmeti operator turistik thotë se ky destinacion mbetet ndër më të kërkuarit e shqiptarëve së bashku edhe me Greqinë, jo vetëm për afërsinë dhe lehtësinë për të shkuar në këto vende, por edhe për raportin cilësi çmim.
“Shifrat duket të jenë konstante çdo vit. 40 mijë shqiptarë kryesisht familjarë zgjedhin Turqinë dhe resortet që ajo ofron për pushime. Shqiptarët kërkojnë shërbimin all inclusive dhe një raport të mirë të këtij shërbimi e ofron në mënyrë specifike Turqia”, tha Mehmeti gjatë një interviste në Vizion Plus.
Por me rritjen çmimeve që kanë pësuar paketat e pushimeve vit pas viti, cili është çmimi dysheme nën të cilin nuk duhet të prenotoni?
“Ne jemi të kujdesshëm ti themi klientëve që nën 1 mijë euro nuk duhet të prenotoni. Oferta ka dhe nën këtë çmim, por ato ofrojnë shërbimet bazike por jo komoditetin që kërkojnë pushimet. Me shtrenjtimin e paketave që ka ndodhur vit pas viti, një çmim normal për pushime all inclusive duhet të nis nga 1 mijë euro”, sqaroi Mehmeti.
Greqia mbetet në vend të dytë për frekuentim të shqiptarëve për pushime. Por e vështirë që të ketë një llogaritje, pasi shumë prenotime bëhen në mënyrë individuale, por dhe me njohje për shkak të numrit të lartë të shqiptarëve që jetojnë dhe punojnë në Greqi.
/vizionplus.tv
