Kryeministri Edi Rama ishte i pranishëm ditën e sotme në Parkun e Apolonisë në kuadër të 35-vjetorit të PS.
Gjatë fjalës së tij, Rama u ndal sërish te protesta në Tiranë dhe te zhurma e madhe mediatike që ka prodhuar në Evropë, por edhe në SHBA.
Rama theksoi se ata që janë në shesh mendojnë se kanë mbështetjen e botës, kur shohin se po pasqyrohen në mediat amerikane dhe ato evropiane, por në të vërtetë po gënjehen.
Sipas tij, në Shqipëri është bërë masakër me gjuetinë e paligjshme, por kjo nuk ka sjellë asnjëherë reagim nga ana e mediave botërore, ndërsa këtë herë fshihet diçka tjetër.
“Ajo që po ndodh sot, jo thjesht me çfarë po ndodh me një grup apo një sërë grupesh njerëzish e kategorish që i ka bashkuar Bulevardi, duke filluar me një shqetësim legjitim për mjedisin e pastaj te kërkesa për vdekjen e tradhtarëve. Më e rëndësishme është se çfarë po ndodh sot me Shqipërinë dhe pse po përdoret kaq masivisht nga vende dhe njerëz që nuk është se kanë dhimbje se çfarë do të ndodhë me flamingot, e as se janë kaq të interesuar për këtë Shqipëri, por sepse Shqipëria sot, përveç të tjerash, është qendër e një sërë përplasjesh.
Thënë kjo, nuk po them se njerëzit që dalin atje janë agjentë, spiunë të futur nga forca të errëta, nuk e them këtë. Por që, përveç një pjese të mirë aty që janë këta politikanët e rinj të partive të reja, që u vjetruan shumë më shpejt se sa normalisht, është një pjesë njerëzish që kanë rënë pre e gjithë kësaj gjëje.
Atyre që shqetësohen për mjedisin, atyre që shqetësohen për Shqipërinë, që Shqipëria nuk mund të shitet, u duket gabimisht sikur bota është me ta, sikur gjithë ai sistem mediatik në Amerikë apo Evropë është në kulmin e një simpatie, sikur këta njerëz po luftojnë për atdheun e tyre, për mjedisin e tyre. Kush mendon kështu, gënjen veten në mënyrë naive.
Shqipëria këtu ka qenë. Çështjet e mjedisit, të kafshëve, të shpendëve, të lumenjve ka pasur, edhe më të rënda madje. Shqipëria ka qenë vendi ku, si në asnjë vend tjetër të Evropës, deri kur ne kemi ardhur në detyrë, bëhej turizëm gjuetie, njësoj si trafikët e tjera. Kishte një sistem të tërë për të sjellë turistë me çifte. Maniakë ndërkombëtarë, të cilët vinin me një sistem organizimi, merreshin me furgona, siç bëhet sot me turistët për guida. Në atë kohë ishte turizmi i vrasjes ilegale të kafshëve dhe shpendëve”, tha Rama.
