Ish-mësuesja e arsimit fillor në SHBA, Madison Bergman, sot 26 vjeçe, shpërtheu në lot në sallën e gjyqit pasi u dënua me 6 vite burg për sjellje të papërshtatshme ndaj një nxënësi 11-vjeçar.
Bergman punonte si mësuese e klasës së pestë në shkollën fillore River Crest në Hudson, Wisconsin, kur babai i fëmijës zbuloi se ajo kishte shkëmbyer rreth 35 mijë mesazhe me djalin e tij brenda vetëm tre muajsh. Sipas hetimeve, komunikimi ishte i papranueshëm dhe shkelte rëndë kufijtë e marrëdhënies mësuese–nxënës.
Gjatë kontrollit në klasën e saj, policia gjeti gjithashtu një dosje me emrin e fëmijës, e cila përmbante shënime personale me përmbajtje të papërshtatshme. Bergman u arrestua disa muaj para martesës së saj dhe vitin e kaluar pranoi fajësinë për një akuzë joshjeje të të miturit dhe dy akuza për abuzim nga personel shkollor.
Prokuroria kërkoi dënim me 12 vite burg, ndërsa mbrojtja kërkoi një dënim më të lehtë. Gjykata përfundimisht vendosi 6 vite heqje lirie.
Në gjykatë, Bergman deklaroi se merr përgjegjësi të plotë për veprimet e saj dhe shprehu keqardhje për pasojat ndaj familjes së fëmijës. Nga ana e tij, babai i nxënësit theksoi se mesazhet e zbuluara ishin thellësisht shqetësuese.
Pas përfundimit të dënimit, ish-mësuesja do të jetë edhe 6 vite nën mbikëqyrje, me ndalim kontakti me të mitur pa leje të posaçme, si dhe me kufizime në përdorimin e internetit dhe rrjeteve sociale.
