Në Ukrainë përkujtohet sot 30-vjetori i shpërthimit në Çernobil, i cilësuar si më shkatërrimtari i historisë së njerëzimit. Sirenat janë dëgjuar në Ukrainë në të njëjtin moment kur u ndodhi reaksioni i pare në orët e para të mëngjesit të 26 prillit 1986. Familjarë të viktimave, por dhe qytetarë ukrainas e rus, kanë ndezur qirinj për viktimat dhe kanë mbajtur një minute heshtje. Por çfarë ndodhi tre dekada më parë? Si rezultat i një reaksioni kimik në centralin bërthamor të Çernobilit, ndodhi një shpërthim që solli çarjen e tavanit të tij. Nga kjo plasje u shënuan 50 viktima. Por pasojat e shpërthimit do të ishin qindra herë më vdekjeprurëse për shkak të përhapjes së një reje radio aktive, që ka prekur Ukrainën, por dhe fqinjët e saj si Rusinë, Bjellorusine dhe disa vende të Evropës. Sipas raportit të Kombeve të Bashkuara “Forumi mbi Çernobilin” të paktën 9 mijë persona kanë humbur jetën nga rrezatimi i lëndëve radioaktive, ndërsa organizata “Green Peace” thekson së numri i viktimave është rreth 10 herë më i lartë, pasi pasojat e Çernobilit po ndihen brez pas brezi. Ende sot e kësaj dite, vendi ku gjendet ky central nuk është pastruar tërësisht nga lendet kimike.
30-vjetori i tragjedisë së Çernobilit
