Familja Mihali u trondit nga lajmi i kobshëm i gushtit të 2017-ës për vdekjen e djalit të tyre të vetëm Marvi Mihali. Djaloshi 19-vjeçar u vra për një karikues celulari në mes të Tiranës nga bashkëmoshatarët e tij, ndërsa për tre vjet rresht prindërit e tij, Fatmira e Pavllo Mihali luftuan me drejtësinë.
Me lot në sy ata kërcënonin se do të merrnin vetë hak nëse nuk vendosej drejtësia për djalin e tyre. Teksa gjykata ka dënuar me burg autorët, familjes Mihali i është shtuar një anëtar i ri. Fatmira dhe Pavllo Mihali janë bërë prindër të një vajze, e cila duket se ka ardhur në jetë për t’u rikthyer shpresën prindërve të Marvi Mihalit. Lajmi është dhënë nga gazetari Bledi Mane në “Facebook”.
“Ata sapo janë bërë prindër të një vajze duke na treguar të gjithëve se jeta ngrihet mbi plagët e vdekjes. Vëllai më i ri në Tiranë Arvi Mihali tashmë nuk lëngon në varr nga plagët e vrasjes me thikë, ai gëzon se tashmë ka një motër të vogël të bukur e cila erdhi në jetë jo për hakmarrje por për të përcjellë dashuri në një vend të plagosur nga qytetarët e tij…”
