Dasma mbretërore britanike mes princit Harry dhe të fejuarës se tij aktores amerikane Meghan Markle, ka tërhequr një vemendje të madhe me një audiencë botërore rekord prej mbi 2 miliardë shikuesish në Evropë, Amerikë, Afrikë e pjesë të tjera të botës,.
Kjo dasmë, e cila mendohet se do kushtoj rreth 30 milionë sterlina më shumë se çdo dasmë tjetër mbretërore deri më tani në Britani, është një dhimbje koke për autoritetet e sigurisë dhe protokollin mbretëror.
Dasma mbretërore, e cila do zhvillohet në qytezën mbretërore Windsor, në veri të Londrës, po i nënshtrohet kontrolleve mjaft të rrepta të sigurisë.
Në ceremoni do të jenë të ftuar nga publiku rreth 2500 të ftuar, ndërkohë në mbrëmjen e dasmës 200 familjarë dhe miq do jenë pjesëmarrës. Interesi i publikut britanik, por edhe atij botëror është i tejskajshëm edhe për faktin se çifti mbretëror janë mjaft të admiruar nga publiku edhe për kauzat publike të bamirësisë që ata i kanë për zemër.
Princi Charles do të shoqërojë Meghan Markle në altar të shtunën kur ajo të martohet me princin Harry. Lajmi është konfirmuar nga pallati Kensington.
Babai i Markle, Thomas, nuk do të marrë pjesë në ceremoni, pasi iu nënshtrua një operacioni në zemër. Vetë Meghan publikoi një deklaratë të enjten në të cilën thekson se ajo shpresonte që ai do të kishte mundësinë të fokusohej tek shëndeti.
