16 shtatori shënon në gjithë botën Ditën Ndërkombëtare të Mbrojtjes së Shtresës së Ozonit, shtresës së brishtë të gazit që mbron Tokën nga pjesa e dëmshme e rrezeve të diellit, duke ndihmuar kështu në ruajtjen e jetës në planet.
Kjo datë është zgjedhur pasi më 16 shtator 1987 është bërë nënshkrimi i Prokollit të Montrealit, me objektivin për të mbrojtur shtesën e ozonit nëpërmjet eliminimit gradual të konsumit dhe prodhimit të lëndëve ozon-holluese.
Përvjetori i kësaj ditë të rëndësishme nënvizon thirrjen drejtuar shteteve për të vijuar punën me mbrojtjen e shtesës së ozonit.
Protokolli i Montrealit është përkufizuar nga Kofi Anan, ish-Sekretar i Përgjithshëm i Kombeve të Bashkuara, si “marrëveshja ndërkombëtare më e suksesshme e realizuar deri më sot”.
Me Protokollin e Montrealit është sjellë si rezultat parësor reduktimin me gati 100 për qind të përdorimit të substancave ozon-holluese duke mundësuar një rekuperim të shtesës së ozonit dhe rikthimin në nivelet e viteve 1980, me një sërë përfitimesh të matshme si evadimi i 2 milion rasteve të kancerit të lëkurës deri në vitin 2030, me pritshmëri të një përftimi në terma ekonomikë deri në 2.2 miliardë dollarë deri në vitin 2050, si rezultat i reduktimit të shpenzimeve për kujdesin shëndetësor si dhe dëmet në agrikulturë .
Njësia Kombëtare e Ozonit në Shqipëri po organizon dhe po mbështet aktivitete të ndryshme për të shënuar këtë ditë ndërkombëtare, në përkujtim të datës së nënshkrimit të Protokollit të Montrealit “Mbi substancat Ozonholluese”.
Një bashkëbisedim me nxënës të shkollave 9-vjeçare u zhvillua të enjten, në mjediset e Europe House në Tiranë, ku ekspertë të fushës ndanë me ta informacione të dobishme mbi mbrojtjen e shtresës së ozonit dhe efektet e ngrohjes globale.
Njohuritë që marrin nxënësit mbi këto problematika që sot trajtohen në nivel global, ndihmojnë në edukimin e tyre si kontributorët e ardhshëm në shoqëri. Për një rol më proaktiv në diskutimet publike dhe vendimarrjet në dobi të komunitetit.
ABC Tirana Club ka organizuar në kuadër të Ditës Ndërkombëtare për mbrojtjen e shtresës së ozonit dhe një ekspozitë pikture, që është edicioni i dytë i projektit “Qyteti im Evropian”.
‘Qyteti im evropian” është një format projekti artistik, që prezanton kryesisht krijime në pikturë, në qytete të ndryshme të vendit, si një kontribut i lirë i nxënësve, shprehje përmes gjuhës së krijimit mbi konceptin dhe ëndrrën e tyre mbi qytetin ku ata banojnë.
