15 vjetori i anëtarësimit të Shqipërisë në NATO u shfrytëzua nga klasa politike shqiptare në të dy anët e kufirit për të vlerësuar rolin e Shteteve të Bashkuara të Amerikës në pranimin e vendit tonë në aleancën më të fuqishme të globit.
“De facto Shqipëria u bë vend anëtar i NATO-s në qershor të 2007 kur erdhi presidenti Bush në Tiranë, i cili nga pikëpamja protokollare shënoi kulmin e marrëdhënieve me ShBA. Por presidenti që dha dy mesazhe substanciale; Shqipëria në NATO dhe pavarësia e Kosovës”, tha FaTmir Mediu.
Ish-ministrja e jashtme Arta Dade solli në vëmendje se pa NATO-n sot nuk do të kishim një Kosovë të pavarur
“NATO nuk mund të konsiderohet vetëm një aleancë ushtarake, dhe nuk është e tillë, dhe sigurisht kur merr vendime siç ishte rasti i bombardimeve në Serbi në kuadrin e mbrojtjes dhe shmangies së gjenocidit nga Milloshevici, patjetër që të gjithë e kujtojmë sekretarin e përgjithshëm Solanen që doli në konferencë për shtyp dhe tha diplomacia dështoi. Pra NATO funksionon më së pari si një organizim politik duke ruajtur vlerat e demokracisë dhe e mbani mend Solanen që ia kaloi fjalën gjeneralit Clarc sepse pasi ishin ezauruar përpjekjet diplomatike NATO do të kthehej e do të ndërmerrte atë aksion historik që ndërmori”, u shpreh Arta Dade.
Ndërkohë Enver Hoxhaj theksoi se pas pavarësisë së Kosovës anëtarësimi i Shqipërisë në NATO është ngjarja më e rëndësishme për kombin shqiptar. Por Hoxhaj nuk e ka fshehur zhgënjimin që Kosova ende nuk ka nisur rrugëtimin drejt aleancës së atlantikut të veriut
“Unë kam qenë i sigurt që lufta në Ukrainë do t’ia mundësonte Kosovës që të kishte të paktën partneritetin për paqe, planin për anëtarësim, gjë që nuk po ndodh”, tha Enver Hoxhaj. Në 1 prillin e vitit 2009 Shqipëria u bë anëtare e NATO-s, një prej momenteve më të rëndësishme./Vizionplus.tv. /
