Ne Korçë, familjet e para kanë nisur të kultivojnë prodhimet e tyre në kopshtet komunitare. 15 familje kanë mbjellë prodhime të ndryshme në parcelat që ndodhen tek parku japonez duke përfituar nga kjo mundësi.
Jetesa në apartamente e kushtëzon hapësirën e çdo familje që kërkon të punojë tokën dhe të merret me diçka, ndaj Bashkia e Korçës ka krijuar këtë hapësirë duke dhënë për familjet sipërfaqe të vogla toke, ku ata mund të mbjellin fruta, perime apo lule të ndryshme dhe të kujdesen për to. Për bashkinë e Korçës, ky është një projekt i rëndësishëm, ndërsa në total do të jenë 27 familje që do të përfitojnë nga kjo mundësi.
Disa nga familjet kanë nisur nga puna dhe e vlerësojnë këtë mundësi që u është ofruar ndërsa punojnë parcelat dhe presin me padurim që të vjelin shumë shpejt prodhimet e tyre.
Në parkun japonez të Korçës gjenden 27 kopshte komunitare që krijojnë mundësinë për ata që dëshirojnë të merren me tokën, por jetojnë në apartamente dhe ky është modeli i parë që zbatohet në Korçë me synimin për t’u shtrirë edhe më gjerë në hapësira të tjera.
