Konferencën e parë për vitin 2022, presidenti Ilir Meta e nisi me çështjen e zgjedhjeve vendore. Ai ka kundërshtuar sot vendimin e Gjykatës Kushtetuese.
Sipas Kreut të Shtetit, Kushtetuesja nuk pati vullnet t’i jepte zgjidhje, duke ia lënë në dorë juridiksionit politike.
Ai tha se ka nisur procedurat për t’i dhënë zgjidhje situatës me bashkitë në vend, që sipas tij, drejtohen nga kryetarë jo formalë.
“Dosja gjyqësore nuk përmban asnjë dokument për të dokumentuar mënyrën si u formuluan pyetjet e gjykatës për në Komisionin e Venecias. Relatorja ka shmangur dërgimin e pyetjeve, duke paraqitur vetëm tre pyetje të ngritura prej saj. Është krejtësisht e paqartë si ka ndodhur kjo dhe kjo cenon dukshëm parimin e transparencës, të palëve në gjykim, dhe që mund të kërkojë hetim të thelluar. Jemi duke analizuar në detaje këtë situatë dhe ditët në vijim do mbajmë një qëndrim zyrtar mbi këtë çështje. Sot jemi këtu për të bërë me dije se kemi filluar procedurat për t’i dhënë zgjidhjeje një çështje, që Gjykata Kushtetuese ju shmang, çështjes së zgjedhjeve vendore 2019. Prej kohësh kemi një situatë absurde, që disa bashki drejtohen pa kryetar, duke krijuar shteg për abuzim. Kjo situatë nuk mund të rri pafundësisht pa zgjidhje, pavarësisht se shumë aktorëve mund t’iu interesojë. Presidenti nuk ka çfarë të presë më, prandaj duke konstatuar se këto institucione, pra bashkitë pa kryetarë formalë, nuk funksionojnë siç duhet, jam sot këtu për t’iu bërë me dije se kam filluar procedurat për t’i dhënë zgjidhje situatës”, tha Meta.
Më tej, ai akuzoi gjyqtarët e Gjykatës Kushtetuese, teksa u shpreh se kanë kryer shkelje të rënda profesionale dhe etike.
“Disa anëtarë të Gjykatës Kushtetuese, kanë kryer shkelje të rënda profesionale dhe etike që cenojnë pozitën dhe figurën e gjyqtarit”, tha Meta.
