Presidenti ukrainas Volodymyr Zelensky ka pranuar në mënyrë të tërthortë se armëpushimi i shpallur nga Kremlini me rastin e Pashkëve është bërë efektiv në shumë zona të vijës së frontit.
Megjithatë, ai ka raportuar se Rusia ka kryer shkelje të shumta të ndalimit të zjarrit dhe ka denoncuar përpjekje “të izoluara” të forcave ruse për të avancuar në disa pjesë të vijës së kontaktit.
“Në përgjithësi, këtë mëngjes të Pashkëve mund të themi se ushtria ruse po përpiqet të krijojë përshtypjen e një armëpushimi, ndërsa në disa zona vazhdojnë përpjekjet e izoluara për të avancuar dhe për t’i shkaktuar humbje Ukrainës,” deklaroi Zelensky pas marrjes së një raporti të ri nga komandanti i ushtrisë ukrainase, Oleksandr Sirski.
Presidenti ukrainas përmendi edhe disa të dhëna konkrete për numrin e sulmeve në zona të ndryshme të Donetskut dhe në një pjesë të frontit në Zaporizhia, duke nënvizuar se Ukraina do të ndalojë luftimet vetëm nëse këtë e bën edhe Rusia. Ai gjithashtu përsëriti propozimin e tij për zgjatjen e armëpushimit të Pashkëve në 30 ditë, raportohet në media.
