Detaje të reja të propozimit për armëpushim në Gaza dolën në dritë të dielën, ndërsa Izraeli dërgoi një ekip negociator në Katar përpara vizitës së kryeministrit Benjamin Netanyahu në Shtëpinë e Bardhë.
“Janë 20 pengje gjallë, 30 të vdekur. Unë jam i vendosur, ne jemi të vendosur t’i kthejmë të gjithë. Dhe gjithashtu jemi të vendosur të sigurohemi që Gaza të mos përbëjë më kërcënim për Izraelin”, tha Netanyahu para se të largohej.
Një person i njohur me negociatat ndau me Associated Press një kopje të propozimit të fundit për armëpushim të paraqitur nga ndërmjetësit te Hamasi.
Dokumenti përshkruan planet për një armëpushim 60-ditor, gjatë të cilit Hamasi do të dorëzonte 10 pengje të gjallë dhe 18 të vdekur, forcat izraelite do të tërhiqeshin në një zonë tampon përgjatë kufijve të Gazës me Izraelin dhe Egjiptin, dhe do të silleshin sasi të konsiderueshme ndihmash
Dokumenti thotë se ndihma do të shpërndahej nga agjencitë e Kombeve të Bashkuara dhe Gjysmëhëna e Kuqe Palestineze. Ai nuk specifikon se çfarë do të ndodhte me Fondacionin Humanitar të Gazës, organizatën amerikane që ka shpërndarë ndihma ushqimore që nga maji. Izraeli dëshiron që ajo të zëvendësojë sistemin e koordinuar nga OKB-ja.
Ashtu si në marrëveshjet e mëparshme të armëpushimit, të burgosurit palestinezë të mbajtur në objektet izraelite do të liroheshin në këmbim të pengjeve, por për numrin e tyre nuk është rënë dakord ende, raporton Politico.
Propozimi nuk garanton një fund të përhershëm të luftës, një kusht i kërkuar nga Hamasi, por thotë se negociatat për një armëpushim të përhershëm do të zhvillohen gjatë 60 ditëve.
Gjatë kësaj kohe, “Presidenti Donald Trump garanton se Izraeli do të respektojë marrëveshjen” dhe do të ndërpresë operacionet ushtarake, ndërsa shton se Trump “do ta njoftojë personalisht marrëveshjen e armëpushimit”.
Trump tha javën e kaluar se Izraeli kishte rënë dakord për kushtet për një armëpushim 60-ditor, por nuk ishte e qartë nëse kushtet ishin ato në dokumentin e shqyrtuar nga AP. Hamasi ka kërkuar disa ndryshime, por nuk i ka specifikuar ato.
Një zyrtar izraelit tha se Kabineti i sigurisë të shtunën vonë miratoi dërgimin e ndihmave në Gazën veriore, ku civilët vuajnë nga mungesa akute e ushqimit. Zyrtari nuk pranoi të jepte më shumë detaje.
Lufta filloi kur Hamasi sulmoi Izraelin më 7 tetor 2023, duke vrarë rreth 1,200 njerëz dhe duke marrë peng 251 të tjerë. Shumica janë liruar në armëpushimet e mëparshme. Izraeli u përgjigj me një ofensivë që ka vrarë mbi 57,000 palestinezë, më shumë se gjysma e tyre gra dhe fëmijë, sipas Ministrisë së Shëndetësisë së Gazës.
