Ambasadori italian, Luca Attanasio është vrarë gjatë një sulmi të kryer në Goma, në Republikën Demokratike të Kongos.
Diplomati italian po udhëtonte me karvanin e ndihmave ushqimore të Organizatës së Kombeve të Bashkuara kur është sulmuar nga disa persona. Ambasadori u qëllua dhe më pas u dërgua me urgjencë në spital, por ai nuk arriti t’u mbijetojë plagëve. Ndërkohë i vrarë mbeti edhe polici që e shoqëronte .
Sipas zyrtarëve të Republikës Demokratike të Kongos, sulmi besohet të ketë qenë një përpjekje rrëmbimi.
Ministri i Jashtëm, Luigi Di Maio ndërsa ishte në Këshillin e Punëve të Jashtme në Bruksel u largua nga mbledhja për t’u kthyer në Romë pas marrjes së lajmit. Përmes një postimi në rrjetet sociale Di Maio tha se autorët duhet të mbajnë përgjegjësi.
“Dy nëpunës shtetërorë u vranë gjatë kryerjes së detyrës së tyre. Rrethanat e këtij sulmi brutal janë ende të paqarta dhe nuk do të kursehet asnjë përpjekje për të hedhur dritë mbi atë që ndodhi.”
Diplomati i lartë italian ka qenë shefi i misionit të Italisë në Kinshasa që nga viti 2017 dhe u bë ambasador në 2019.
