Ashtu si çdo vit, edhe këtë 28 Nëntor, Vlora është shndërruar në kryeqendrën e festimeve për Pavarësinë.
Kryetarja e Bashkisë së Vlorës, Brunilda Mersini, në një lidhje të drejtpërdrejtë në edicionin qendror të lajmeve në televizionin kombëtar Vizion Plus me moderator Erion Zeqiraj, zbuloi më shumë detaje rreth aktiviteteve të mbajtura sot në Vlorë për Ditën e Flamurit.
Znj. Mersini u shpreh se Vlora ka përjetuar një nga vitet me pjesëmarrjen më të lartë të qytetarëve në festimet e Ditës së Flamurit.
Ajo shtoi se festimet janë shoqëruar me një sërë aktivitetesh kulturore, koncerte dhe performanca artistike, ndërsa programi festiv do të vijojë edhe në ditët në vijim me maratonën dhe evente të tjera kulturore.
INTERVISTA E PLOTË:
Si ka qenë numri i atyre që kanë zgjedhur Vlorën për të festuar Ditën e Flamurit, krahasuar me vitin e kaluar? Nëse mund të bëjmë një krahasim?
Mersini: Çdo vit numri i shqiptarëve që ndjejnë festën e flamurit rritet. Dhe ky numër sot ishte shumë i lartë në sheshin e flamurit. Në momentin e ngritjes së flamurit, morën pjesë përfaqësues të lartë të Shqipërisë dhe të Kosovës. Dhe, në tingujt e muzikës folklorike mbarëshqiptare, ngritja e flamurit pati emocione të veçanta. Gjithashtu, në çdo cep të Vlorës, në ditën që na bën krenarë ne vlonjatëve, ka pasur aktivitete të zhanreve të ndryshme. Këto aktivitete kulmojnë sot në orën 19:00 me koncertin festiv. Ky është një koncert me këngëtarë të mirënjohur dhe është një koncert që fton qytetarë nga gjithë Shqipëria.
Çfarë aktivitetesh janë mbajtur gjatë ditës për Pavarësinë dhe kur mbyllen festimet?
Mersini: Festimet vazhdojnë edhe ditën e nesërme. Kemi aktivitete edhe ditën e pasnesërme, ku ne kemi maratonën. Por sot ka pasur aktivitete të ndryshme. Aktivitetet kanë filluar me ceremoninë zyrtare. Ka pasur koncerte të ndryshme nga treva të ndryshme, kudo nga Kosova, Tetova. Ka pasur panairin e artizanëve. Në orën 18:00 ka qenë një shfaqje kombëtare, dhe ajo performoi me një bukuri të jashtëzakonshme.
/vizionplus.tv
