Detaje të reja kanë dalë në dritë nga vrasja e shqiptarit nga Kosova Nexhat Rama, që u gjet i pajetë ditën e shtunë në një zonë të Bershias.
Rama u vra nga mekaniku Cristiano Mossali, ndërsa autoritetet italiane kanë rindërtuar dinamikën e ngjarjes së ekzekutimit të shqiptarit.
Sipas asaj që shkruajnë mediat italiane Cristiano Mossali i është afruar nga mbrapa Ramës dhe e ka qëlluar me një plumb në kokë, dhe më pas e ka hipur në bagazhin e makinës duke e çuar në fshatin ku u gjet viktima, duke i vënë zjarrin.
“Dinamika e vrasjes duket mjaft e qartë. Nexhat Rama është sulmuar ndoshta nga prapa nga vrasësi i tij, i cili ka qëlluar të paktën një plumb në kokë, duke i shkaktuar vdekjen dhe më pas ka ngarkuar trupin në të njëjtën makinë, duke e marrë atë në fshatin ku më pas iu vu zjarri, me trupin e Nexhatit brenda”, kjo është ajo që raportojnë mediat italiane.
Sipas hetimeve 53-vjeccari Cristiano Mossali, i kishte viktimës një borxh prej 50 mijë eurosh, të cilën nuk kishte mundësi që t’ia shlyente, kjo ka qenë edhe arsyeja që e ka shtyrë në krim.
Cristiano Mossali kishte përgatitur gjithçka për të kryer krimin e tij. Ditën e ngjarjes ai u kishte dhënë leje dy punonjësve të tij që të qëndronin në shtëpi, ndërsa familjes i kishte kërkuar që ta mbronin para karabinierëve në çdo rast, duke krijuar alibinë se ditën e vrasjes së shqiptarit ai kishte qenë duke drekuar me familjen.
Por mesa duket asnjë nga alibitë e Cristiano Mossali nuk është besuar nga ana e autoriteteve italiane.
