Presidenti amerikan Donald Trump, mbrojti sulmet amerikane muajin e kaluar ndaj objekteve bërthamore të Iranit, duke e paralajmëruar Teheranin se Uashingtoni do të sulmonte përsëri nëse është e nevojshme.
“Po, janë shkatërruar, siç e thashë më parë, dhe po, do t’i godasim sërish nëse është e nevojshme,”, tha Trump.
Ky reagim I kreut të shtëpisë së bardhë vjen pas deklaratës së ministrit të jashtëm Iranian Abbas Araghchi I cili tha se vendi I tij nuk do të heqe dorë nga pasurimi I uraniumit.
“Momentalisht pasurimi i uraniumit është ndalur, sepse dëmet janë serioze dhe të rënda. Por, natyrisht që ne nuk mund të heqim dorë nga pasurimi, sepse është arritje e shkencëtarëve tanë”, tha Ministri i jashtëm Iranian Abbas Araghch.
Sipas shefit te diplomacies iraniane çdo marrëveshje bërthamore që mund të arrihet, duhet ta ketë të përfshirë edhe të drejtën për pasurim uraniumi.
Deklaratat e ministrit iranian vijnë teksa Teherani pritet të zhvillojë bisedime të reja për programin bërthamor me Gjermaninë, Francën dhe Mbretërinë e Bashkuar. Bisedimet do të zhvillohen të premten në Stamboll.
Kur është pyetur nëse uraniumi i pasuruar është ruajtur diku nga sulmet, Araghchi ka thënë se “nuk ka informacion të detajuar”, por sipas tij Organizata e Iranit për Energji Atomike është duke tentuar “të bëjë vlerësime se çfarë ka ndodhur saktësisht me materialin e pasuruar”.
Uashingtoni ka bombarduar tri qendra bërthamore në Iran më 22 qershor për të mbështetur ofensivën ushtarake 12-ditore të Izraelit.
Ushtria amerikane e ka shënjestruar edhe qendrën kryesore për pasurim të uraniumit, Fordo, që gjendet në jug të Teheranit.
Presidenti amerikan, Donald Trump ka thënë disa herë që sulmet kanë rezultuar me sukses dhe që të tria qendrat iraniane “janë shkatërruar plotësisht”.
/vizionplus.tv
