Shqipëria ka dhënë një kontribut të madh në luftën ndaj terrorizmit. Kështu e ka vlerësuar Departamenti Amerikan i Shtetit vendin tone në raportin për terrorizmin për vitin 2016, të publikuar këtë të mërkurë. Në kapitullin për Shqipërinë, DASH shkruan se vendi ynë ofroi mbështetje të rëndësishme në përpjekjet për të luftuar terrorizmin duke marrë pjesë në koalicionin ndërkombëtar kundër ISIS. Sipas raportit, Shqipëria ka kontribuuar duke bërë donacione në armë dhe municione.
DASH përmend gjithashtu edhe arrestimin në vendin tonë të katër personave që kishin planifikuar të kryenin një sulm terrorist në stadiumin e Shkodrës në ndeshjen Shqipëri-Izrael në 12 nëntor të 2016s. Raporti vlerëson edhe faktin se të arrestuarit u akuzuan për mbështetje financiare dhe logjistike të ISIS, për rekrutim të luftëtarëve dhe për promovim të gjuhës së urrejtjes. Sipas SHBA, në Shqipëri janë rritur përpjekjet për të zbuluar kërcënimet terroriste.
“Njësia kundër terrorizmit e Policisë së Shtetit, e zgjeruar së fundmi, ka punuar ngushtë me Programin Ndërkombëtar të Asistencës për Trajnimin e Hetimeve Penale të Departamentit të Drejtësisë në SHBA. Drejtoria Anti-Terror ka zhvilluar më tej programet e veta të trajnimit dhe aktualisht është duke punuar për një strukturë të re. Pavarësisht mungesës së burimeve njerëzore, Drejtoria Anti-Terror mori pjesë në disa operacione të suksesshme ku u ndaluan terroristë të njohur ose të dyshuar.”
Gjithashtu, në raport theksohet se korrupsioni i kombinuar me një sistem të dobët gjyqësor, vazhdon të pengojë përpjekjet e organeve ligjzbatuese në Shqipëri në të gjitha nivelet.
