Një tjetër njësi task force është ngritur në varësi të Ministrisë së Infrastukturës. Ajo do të skanojë të gjitha shkeljet që do të kryhen nga mjetet e mallrave, autobuset e linjave ndërurbane, taksitë apo dhe mjetet e tonazhit të rëndë.
Finalizimi i kësaj taks-force vjen pas marrëveshjes së Policisë së Shtetit dhe Drejtorisë së Përgjithshme të Transportit Rrugor.
Objekt i kontrollit do të jenë lejet dhe licensat, respektimi i numrit të pasagjerëve në autobuzët ndërqytetas si dhe mjetet e tjera të tansportit si të qytetarëve ashtu edhe të mallrave.
Kreu i Policisë së Shtetit Gledis Nano tha se kjo marrëveshje është e rëndësishme për të vendosur në zbatim ligjin për sigurinë rrugore.
Një task force e tillë e etiketuar si policia gri ka funksionuar edhe më përpara po në varësi të ministrisë së Transporteve, por në vitin 2017 ajo u shkri me vendim të qeverisë pasi sipas kryeministrit Rama nuk solli rezultatet e duhura.
