Ambasadori Amerikan Donald Lu ka zhvilluar në mesditë një takim me ish-kryeministrin Sali Berisha. Kjo është hera e parë që diplomati amerikan takohet me ish-kreun e Partisë Demokratike Berisha, që prej nisjes së protestës të opozitës dhe bojkotit të Parlamentit.
Ajo që bie në sy në njoftimin e shpërndarë për mediat nga zyra pranë Ish-Kryeministrit është se në asnjë moment Berisha nuk ka folur për krijimin e një qeverie teknike, për shtyrje të zgjedhjeve apo bojkot të tyre; të cilat përbëjnë tezat kryesore të kreut të PD Lulzim Basha.
Në njoftim e zyrës së shtypit sqarohet se Berisha e ka njohur Diplomatin Amerikan me arsyet e protestës dhe bojkotit të Parlamentit.
Arsyeja e parë sipas Berishës është kanabizimi i vendit, pastaj lirimi i bandave kriminale me të rrezikshme si dhe presioni mbi administratën publike për të votuar qeverinë.
Gjatë bisedës me Ambasadorin, Berisha ka përsëritur akuza kundër Xhorxh Soros duke theksuar se qeveria amerikane duhet të ndalojë veprimtarinë e tij në mbështetje të kryeministrit Edi Rama.
