Demokratja Jorida Tabaku deklaroi se Shqipëria vijon të jetë në listën e shteteve ku është prezent fenomeni i pastrimit të parave.
Përmes një postimi në “Facebook”, Tabaku u shpreh se sektorët më të prekur nga ky fenomen janë turizmi dhe ndërtimi.
Ajo shtoi se gjërat do të përkeqësohen duke marrë parasysh kriptomonedhat dhe sipas saj, qeveria është e paaftë ta luftojë pastrimin e parave.
“Shqipëria jonë vazhdon të jetë në listën e vendeve të dyshuara për pastrimin e parave. Dëshmi se si një nga 15 kriteret e vendosura nga KE nuk është përmbushur dhe provë shtesë që tregon se si pastrimi parave është një nga rrugët se si krimi organizuar gjallon në vend. Ekonomia informale që zgjerohet përditë për shkak të politikave të gabuara që qeveria ka ndërmarrë këto 8 vite. Por, mbi të gjitha, mbështetja e madhe që krimi organizuar kanë pasur në pastrimin e parave. Ndërtimi, turizmi janë vetëm disa nga sektorët që janë kthyer në zhguallin mbrojtës të atyre që pastrojnë paratë. Fatkeqësisht nuk do të jenë të vetmit duke pasur parasysh kriptomonedhat dhe paafësinë e qeverisë për të menaxhuar edhe këtë formë të re pastrimi parash. Një gjë është e sigurtë; shqiptarët nuk janë fajtorë për sa po ndodh pasi fajtorët e vërtetë janë ato që vjedhin zgjedhjet me paratë e pista dhe më pas janë peng i tyre.”
