Zbulohen dy super antitrupa që bllokojnë hyrjen e virusit Sars-Cov-2 në qeliza: ata veprojnë me mekanizma pak më të ndryshëm dhe, nëse administrohen në doza të vogla, individualisht ose së bashku, ata janë në gjendje të parandalojnë infeksionin tek minjtë. Rezultati, i cili hap rrugën për terapi të reja të bazuara në koktej me antitrupa, është botuar në revisten e njohur “Science” nga një grup ndërkombëtar i udhëhequr nga Universiteti i Uashingtonit.
Massimo Galli, Agostino Riva dhe Arianna Gabrieli nga Spitali Sacco në Milano gjithashtu morën pjesë në studim.
Sipas virologut Galli, dy antitrupat e rinj neutralizues, të quajtur S2E12 dhe S2M11, janë “shumë premtues për zhvillimet e ardhshme në trajtimin e Covid-19”.
Studiuesit i identifikuan ato duke rishikuar gati 800 antitrupa të izoluar nga 12 pacientë që u rikuperuan nga infeksioni. Mekanizmi i tyre i veprimit është studiuar në nivelin molekular falë mikroskopit super krio-elektronik (një teknologji e akorduar me Çmimin Nobel në kimi në 2017).
Në këtë mënyrë u zbulua se të dy, S2E12 dhe S2M11 parandalojnë bashkimin e virusit në receptorin Ace-2 të qelizës pritëse dhe e bëjnë këtë me mekanizma të ndryshëm dhe konkurrues të veprimit. Në veçanti, antitrupi S2M11, gjithashtu arrin të bllokojë proteinën e famshme Spike që virusi përdor si çelës për të hyrë në qelizë, duke parandaluar në mënyrë efektive infeksionin. Përveç neutralizimit të virusit, antitrupat gjithashtu duket se favorizojnë reagimin e qelizave specifike imune që luftojnë infeksionet, duke i ndihmuar ata të eleminojnë armikun.
“Ne mendojmë se shfrytëzimi i mekanizmave të shumtë, të ndryshëm dhe plotësues të veprimit lejon më shumë përfitime në aplikimet klinike”, shkruajnë autorët e studimit.
