Nënkryetari i Partisë Demokratike, Edmond Spaho akuzon qeverinë Rama se të gjithë kriminelët që në kohën e PD-së u futën në burg, po fitojnë lirinë për sjellje të mirë.
“Ne nuk jemi njësoj me Edi Ramën. Ne nuk padisim në gjykatë asnjë ligj kundër krimit të organizuar, siç bëri Edi Rama në vitin 2009 me Ligjin Antimafia. Me Vasilika Hysin dhe Etilda Gjonin të Komitetit Shqiptar të Helsinkit, Edi Rama e ankimoi atë në Gjykatën Kushtetuese me shqetësimin se shkelte të drejtat e anëtarëve të krimit të organizuar. Gjatë qeverisë së Partisë Demokratike 285 grupe të strukturuara kriminale, prej të cilave 18 organizatat më të rrezikshme mafioze në vend, shkuan prapa hekurave të burgut. Sot, në qeverinë e Edi Ramës dhe të Taulant Balles, ata po fitojnë një nga një lirinë, sepse drejtori i burgut të Edi Ramës dhe Kryetari i Bashkisë së Edi Ramës kanë dalë garantë për sjelljen e mirë të kriminelit të rrezikshëm, që ka blerë vota për Edi Ramën.”
Me këtë argument, Spaho thekson se kryeministri Rama dhe Taulant Balla ka nisur një strategji të dështuar për t’i identifikuar kundërshtarët e “Anti-KÇK”-së me krimin. Ndërsa shton se opozita dhe shumica e shqiptarëve nuk beson se banda që është sot në qeveri do të luftojë banditët që ka liruar nga burgjet.
“Shqiptarët nuk besojnë se Taulant Balla psh do të luftojë pasurinë e mikut të vet trafikant droge, Edmond Bego. Apo Edi Rama të urdhërojë hetimin e pasurisë së Saimir Tahirit apo Ermal Hoxhës, bashkëpunëtorit të Olsi Ramës në laboratorin e kokainës në Xibrakë. Propaganda dhe mashtrime publike nuk e ndryshojnë dot të vërtetën. Edi Rama është kreu i KÇK-së, bashkëqeveris me krimin e organizuar, i jep krimit tendera, koncesione dhe pasuri publike.”
