Policia e Tiranës ka marrë masat për garantimin e rendit dhe sigurisë para, gjatë dhe pas ndeshjes së futbollit mes KF Tirana dhe Partizanit, që do të zhvillohet sot në orën 19:00 në stadiumin “Arena Kombëtare”.
Nga ora 17:00 deri në përfundim të aktivitetit do të jenë të bllokuara segmentet rrugore: Sheshi “Nënë Tereza”, rruga “Lekë Dukagjini”, rruga “Dervish Hima” dhe zonat përreth stadiumit “Air Albania”.
Rrugëkalimet e tifozëve janë përcaktuar si më poshtë:
- Tifozët e Tiranës do të lëvizin nga përballë “Teatrit të Kukullave”, rruga “Xhorxh Bush”, rruga e “Elbasanit”, pranë Ambasadës së SHBA-së, më pas në rrugën “Dervish Hima”, rrugën “Sheh Ahmet Pazari” dhe drejt tribunës “S” të stadiumit.
- Tifozët e Partizanit do të kalojnë nga kryqëzimi i rrugës “Muhamet Gjollesha”, ura “Vasil Shanto”, kryqëzimi i rrugës “Komuna e Parisit”, rruga “Sulejman Delvina”, pranë Librit Universitar, Presidencës, drejt COIN dhe më pas drejt hyrjeve tek tribunat N dhe E.
Policia do të sigurojë lëvizjen e tifozëve brenda itinerareve të përcaktuara dhe nuk do të lejojë grumbullime apo kalime jashtë rrugëve të caktuara.
Para hyrjes në stadium do të kryhen kontrolle strikte për sende të ndaluara si sende të forta, bidonë uji, çadra, çelësa metalikë dhe lëndë piroteknike. Çdo tifoz duhet të ketë dokument identifikimi.
Në stadium nuk do të lejohen shtetas pa dokument identifikimi, fëmijët nën 16 vjeç pa praninë e prindit ose kujdestarit, si dhe tifozët e identifikuar si problematikë në aktivitete sportive të mëparshme.
Policia kërkon mirëkuptimin e tifozëve dhe qytetarëve për respektimin e masave dhe shmangien e lëvizjes me automjete në zonat e bllokuara gjatë orarit të përcaktuar.
/vizionplus.tv
