Protestat e qytetarëve në Athinë, Greqi, kundër projektligjit për sigurinë në universitete, kanë vijuar edhe ditën e mërkurë. Zemërimi i qytetarëve prej disa ditësh tashmë, është shkaktuar nga një legjislacion i propozuar nga qeveria rreth rritjes së sigurisë në universitete dhe vendosjen e forcave të policisë në ambientet e fakulteteve.
Ky projektligj, ka bërë që mijëra protestues të mblidhen para parlamentit grek në sheshin Syntagma, duke hedhur kokteje molotov gjatë përplasjeve me policinë.
Aktualisht, policia është e ndaluar të hyjë në mjediset e institucioneve të arsimit të lartë, për shkak të një ligji të miratuar në vitin 1973, pasi qeveria e atëhershme, shtypi me dhunë një kryengritje studentore në Politeknikun e Athinës.
Grekët e shohin këtë reformë që qeveria planifikon të miratojë, si një kthim mbrapa të lirive për të cilat kanë luftuar ashpër e që janë thelbësore në jetën akademike greke. Qytetarët kërkojnë që qeveria të tërhiqet nga projekt-ligji.
Protestuesit, janë filmuar duke marshuar drejt një blloku policor, përpara se të përplaseshin fizikisht me punonjësit e rendit, duke përdorur bomba zjarri. Policia është kundërpërgjigjur me gaz lotsjellës dhe është raportuar se ka arrestuar vetëm 30 prej tubuesëve.
Studentët demonstruan gjithashtu edhe në Selanik, me aktivistë që bllokuan hyrjen në universitetin kryesor të qytetit grek.
Ndërkohë deputetët grekë pritet të votojnë këtë të enjte reformat që po shkaktojnë zemërim.
