Aksidentet rrugore vijojnë të mbeten një ndër problemet më shqetësuese për sigurinë publike në vend, duke shkaktuar çdo ditë dhjetëra të lënduar dhe humbje jete. Gëzim Hoxha, ekspert i sigurisë rrugore, shpjegon disa nga shkaqet të cilat ndikojnë në rritjen e numrit të këtyre aksidenteve.
“Nuk ka drejtues automobili, motomjete apo automjeti të aftë apo të paaftë. ka të kujdesshëm apo të pakujdesshëm. Pra në një moment të caktuar një tërheqje vëmendje në celular, një mosrespektim i distancës së sigurisë. Unë do të thoja që këtu kërkohet një ndërgjegjësim i njerëzve, jo vetëm me gjoba sepse gjoba është një formë edukimi, por duhet të vazhdohet me forma të tjera”, tha eksperti.
Hoxha thekson se është shumë e rëndësishme që këto vepra penale të parandalohen përpara se të shkaktojnë pasoja fatale.
“Tek vijat e kalimit të këmbësorëve qarkullojnë njerëzit vetëm me biçikleta dhe bëhen premisë për aksidente. Krijojnë konflikt me qytetarët, na hanë atë që quhet kohë. Disa nga këto vepra penale duhen klasifikuar ndryshe. Nëse qarkullon me motoçikletë në trotuar apo me motomjet në trotuar ti duhesh arrestuar për vrasje e ngelur në tentativë. Ti duhesh parandaluar duket sikur është motomjet por është mjet vrasës, ky është dhe shkaku që janë ndarë në korsi”, shtoi Hoxha.
Po ashtu, eksperti ndalet edhe te skuterat elektrikë, të cilat aktualisht janë të ndaluar për përdorim nga qytetarët. Sipas tij megjithëse ekziston një ligj, shumë njerëz nuk e respektojnë atë duke u bërë kështu rrezik për kalimtarët.
“Scooterat janë mjete lëvizëse prandaj nuk kemi ndonjë ligj që i ndalon, ato ngjasojnë me biçikletat. Këta scootera futen në sens të kundërt. Scooterat duhet parë nëse duhet apo jo të qarkullojnë. Duhet që policia të punojë për këtë qëllim. Nuk e respektojnë sepse ligji është, mjetet me dy rrota kanë bërë një korsi të dedikuar. Asnjë scooter nuk kalon te korsia e biçikletave. Ata kalojnë të gjithë mbi trotuare, futen ndërmjet automobilave duke shkaktuar rrezik për jetën e tyre”, tha Hoxha.
Gjatë periudhës janar-mars 2026 në spitalin Universitar të Traumës janë regjistruar në total 664 raste traumash të shkaktuara nga aksidentet automobilistike. Të dhënat tregojnë se grupmoshat më të prekura janë 25-55 vjeç. Në krahasim me të njëjtën periudhë të vitit 2025 konstatohet një rritje prej 17% të numrit të rasteve të paraqitura. Për 21 qytetarë të aksidentuar trauma ka rezultuar me pasojë fatale./vizionplus.tv
