Teksa të martën u duk se pati një rënie të numrit të të infektuarve në 24 orë, diçka e tillë ndryshoi këtë të mërkurë. Të martën u shënuan vetëm gjashtë raste të reja, por të mërkurën drejtoresha e Institutit të Shëndetit Publik, Albana Fico njoftoi për 17 të infektuar të tjerë. Në vendin tonë kemi gjithsej 400 të konfirmuar me COVID-19.
“Në vijim të komunikimit të përditshëm, ju bëjmë me dije se vazhdon puna në terren për identifikimin e rasteve të reja dhe gjurmimin e kontakteve të rasteve, të konfirmuara pozitive. Në 24 orët e fundit janë testuar 236 persona të dyshuar, prej të cilëve janë konfirmuar 17 raste të reja me COVID-19. Deri në këto momente janë testuar 2989 raste të dyshuara dhe prej tyre janë të konfirmuar pozitivë me COVID-19, 400 raste.”
Të shtruar në të dy spitalet COVID janë 58 pacientë, nga të cilët 4 janë në gjendje më të rëndë. Albana Fico tha se është shumë e rëndësishme të ruhen masat sepse ka raste brenda të njëjtës familje ngaqë nuk shmangen vizitat tek të afërmit.
