Shtëpia e Bardhë njoftoi se një takim mes zyrtarëve amerikanë dhe kinezë për bisedime tregtare do të zhvillohet brenda shtatë ditëve.
Lajmi vjen pas një bisede telefonike mbi një orë mes presidentit Donald Trump dhe homologut kinez Xi Jinping.
Xi kërkoi heqjen e masave tregtare amerikane. Trump e quajti bisedën “shumë pozitive” dhe shpalli rifillimin e dialogut tregtar, ndërsa të dy liderët shkëmbyen ftesa për vizita zyrtare.
Tensionet mbeten të larta për shkak të çështjeve si Tajvani, trafiku i fentanilit, teknologjitë e avancuara dhe ndalimi i eksporteve të mineraleve të rralla nga Kina, që po ndikojnë zinxhirët globalë të furnizimit.
Megjithëse më 12 maj u arrit një marrëveshje e përkohshme 90-ditore për uljen e tarifave ndëshkuese, armëpushimi tregtar mbetet i brishtë.
