Partia Demokratike, përmes Çlirim Gjatës dhe Flutura Açkës, kërkon informacion për ecurinë e hetimeve për shembjen e Teatrit Kombëtar, kallëzim i depozituar në SPAK nga ana e demokratëve 13 muaj më parë.
Pas vendimit të Gjykatës Kushtetuese, PD nënvizon se tashmë SPAK i ka duart e lira, ndërsa kërkon të vendosë nën arrest përgjegjësit, duke filluar me kryetarin e Bashkisë, Erion Veliaj.
Në një deklaratë për mediat, demokratët përsëritën akuzat e tyre se kryeministri Edi Rama dhe Veliaj kryen nëntë vepra penale për “interesa korruptive”.
“Ne kemi bërë një kallzim mbështetur në 9 vepra penale ku janë përcaktuar me rradhë në këtë kallzim personat përgjegjës që fillojnë me Kryeministrin Edi Rama, me kryebashkiakun e Tiranës Erjon Veliaj dhe të gjithë të tjerët me radhë që kanë marrë pjesë në këtë masakër që i është bërë, kulturës së trashëgimisë sonë dhe pasurisë publike. E gjitha kjo në emër të korrupsionit, në emër të abuzimit, të shfrytëzimit të pasurisë publike për interesat e tyre personale, për interesa të oligarkisë që ata mbrojnë. Jemi këtu për t’i kërkuar SPAK informacionin se çfarë ka bërë me kallzimin tonë, pa folur se ka mbi 10 kallzime të Aleancës për Mbrojtjen e Teatrit. Çfarë ka bërë me këto hetime? Përse SPAK vonohet kaq shumë, përse nuk ka transparencë? Brenda asaj që quhet sekret hetimor, duke ruajtur sekretin hetimor, brenda ligjit, duhet dhënë një informacion, nëse ka thirrur njeri, ka marrë ndonjë dokument, ndonjë provë, ndonjë kqyrje në vendngjarje. Çfarë ka bërë deri tani? Ne kërkojmë që të na kthejnë përgjigje”, deklaroi Çlirim Gjata.
